Advokat Nikolay Polozov Kreml kontrol etken Qırım Yuqarı mahkemesiniñ qırımtatar milliy areketi liderleriniñ birisi Ahtem Çiygoz davasınıñ iyülniñ 10-da keçirilgen oturışnıñ teneffüsi vaqtında Qırım müftisi Emirali Ablayevni mahkemege kelip şaatlıq etmege çağırdı.
«Emirali Seitibraimoviç, siz musulman olaraq, Qırım musulmanlarınıñ yolbaşçısı olaraq mahkemege kelip, doğru malümat bermege mecbursıñız. Sizni mahkemege kelmege çağıram. Bu em siziñ, em qırımtatar halqı, em de Qırımdaki bütün musulmanlar içün müim», – dedi Polozov.
Advokat Polozov Kreml kontrol etken Qırım Yuqarı mahkemesiniñ Ahtem Çiygoz davasınıñ oturışında mahkeme Qırım müftisi Emirali Ablayevni sorğuğa çekmege istemey, dep ayttı.
Kreml kontrol etken Qırım Yuqarı mahkemesi iyülniñ 5-de qırımtatar milliy areketi liderlerinden birisi Ahtem Çiygoznıñ imayesine müfti Emirali Ablayevni sorğuğa çekmege izin bermedi. Qadılar «imayeniñ muracaatı temelsiz» olğanını ayttılar.
Kreml kontrol etken Qırım Yuqarı mahkemesi iyünniñ 27-de olıp keçken oturışında qırımtatar milliy areketi liderleriniñ birisi Ahtem Çiygoz imayesiniñ Qırım müftisi Emirali Ablayevni sorğuğa çekmek muracaatını red etken edi.
Kreml kontrol etken işğal altındaki Qırımnıñ Yuqarı mahkemesi iyünniñ 22-de Ahtem Çiygoznıñ apiste yatma müddetini üç ayğa – oktâbrniñ 8-ne qadar uzattı. Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
