Link açıqlığı

Bağçasaraylı «Hizb ut-Tahrir davasınıñ» mabüsleri Memetov ve Abiltarovnıñ apiste yatma müddeti sentâbrniñ 12-ne qadar uzatıldı


Qırım Yuqarı mahkemesiniñ binası, nümüneviy resim

Kreml kontrol etken işğal etilgen Qırımnıñ Yuqarı mahkemesi iyülniñ 7-de bağçasaraylı «Hizb ut-Tahrir davasınıñ» eki mabüsi Remzi Memetov ve Rustem Abiltarovnı sentâbrniñ 12-ne qadar nezaret altında qaldırmağa qarar aldı. Bunı Radio Svoboda mühbiri Anton Naumlük Qırım.Aqiqatqa haber etti.

Mahkeme oturışı ve qarar seslendirilmesi qapalı şekilde keçirildi.

«Hizb ut-Tahrir davası» çerçivesinde qabaatlanğan «Bağçasaray dörtlüsiniñ» apiste yatma müddetiniñ uzatılması boyunca mahkeme vaqtında diñleyicilerni mahkeme binasına bile almaylar, oturış salonını endi aytmayım. Mahkeme qararları qanunğa zıt bir şekilde qapalı şekilde seslendirile», – dep yazdı advokat Emil Kürbedinov Facebookta.

Davanıñ daa eki mabüsi Zevri Abseitov ve Enver Mamutov boyunca qarar çıqarılması beklenile.

Mayısnıñ başında mahkeme bağçasaraylı «Hizb ut-Tahrir davasınıñ» dört mabüsiniñ apiste yatma müddetini 2017 senesi iyülniñ 11-ne qadar uzatqan edi.

2016 senesi mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG