İstanbulda Qara deñiz iqtisadiy emekdeşlik teşkilâtınıñ Parlament Assambleyasınıñ (QDİET PA) 49-nci plenar sessiyası devamında Türkiye Büyük Millet Meclisiniñ reberi İsmail Kahraman QDİET PA yolbaşçılığını Ukraina Yuqarı Rada reisi Andriy Parubiyge temsil etti ve Ukrainağa Qara deñiz regionında sulh ve amanlıqnıñ pekinmesini tiledi. Bunen beraber Kahraman, Ukrainanıñ topraq bütünligi ve suverenitetini desteklegenini bildirdi. Bunı ukrain parlamentiniñ matbuat hızmeti iyülniñ 6-nda haber etti.
Bildirüvde: «O (İsmail Kahraman – QA) Ukraina Yuqarı Rada reisine bildirdi ki, Türkiye Qırımnen bağlı mevzularnı halqara seviyede muzakere etecek ve meseleni sustırmağa bermeycek», – dep aytıla.
Andriy Parubiy ise İsmail Kahramanğa, Ukrainanı, onıñ suvereniteti ve topraq bütünligini desteklegeni içün, teşekkür bildirdi ve Rusiyege qarşı sanktsiyalarnı küçlendirmege çağırdı.
«Qırımnı ve Donbassnıñ bir qısımını işğal etip, Putin bütün halqara uquq nizamını ve Ekinci cian cenkinden soñ tertip etilgen halqara telükesizlik sistemasını bozdı. Putinni ancaq sanktsiyalar toqtata bile. Bu sebepten türkiyeli ortaqlarımıznıñ yardımına işanamız ve ayrıca Rus tecavucısına qarşı halqara basqını küçlendirmege çağıramız», – dedi Parubiy.
Bunen beraber o Turkiye parlamentiniñ yolbaşçısını Ukrainağa resmiy ziyaret ile teşrif buyurmağa davet etti.
Ukraina millet vekili, Ukrainanıñ QDİET PA eyyetiniñ azası Refat Çubarov ise, öz nevbetinde, Assambleya azalarınıñ ekseriyeti Qırımda saylanılğan Qırımlı deputatnı toplaşuvda qabul etmegenine emiyet berdi.
«Kerçekten, subetdeşlerimniñ episi, öz aralarında iç te sözleşmeyip, Rusiye Federatsiyası tarafından «Qırımlı deputatlar» olaraq kösterilgen bazı şahıslarnıñ vekâletini qabul etilmemesinde QDİET PA azaları bir fikirde (Rusiye ve Ermenistanğa qarşı teşkilât azaları olğan 10 devlet) çıqqanlarınıñ büyük emiyetini qayd etti», – dep yazdı Çubarov Facebookta.
İyülniñ 5-nde, çarşenbe künü, İstanbulda Qara deñiz iqtisadiy emekdeşlik teşkilâtınıñ Parlament Assambleyasınıñ (QDİET PA) 49-nci plenar sessiyası öz işini başladı. Parlament Assambleyası – QDİET sistemasınıñ parlamntlerara işbirlik organıdır.
QDİET PA reisiniñ muavini olaraq Ukraina Yuqarı Rada eyyetiniñ reberi Lüdmila Denisova saylanıldı.
İyülniñ 5-nde İstanbuldaki plenar sessiyanıñ oturışında işğal etilgen Qırımda saylanılğan Rusiye millet vekili Pavel Şperov QDİET PA azasınıñ vekâletini qazanmadı. Ukrain eyyetiniñ muracaatınen, mezkür şahısnı salondan çıqarmaq içün Baş Assambleyanıñ toplaşuvında teneffüs ilân etilgen edi.
Avropa Birligi ve ABD tarafından bundan evel, işğal etilgen Qırımda qomşu Rusiyeniñ parlamentine saylanılğan deputatlarğa qarşı sıñırlamalar qabul etilgen edi. Pavel Şperovtan ğayrı sanktsiyalar cedveline Konstantin Baharev, Andrey Közenko, Svetlana Savçenko, Ruslan Balbek ve Dmitriy Belik kirgen ediler.
Devlet Dumasınıñ yedinci çağıruv saylavları 2016 senesi sentâbrniñ 18-nde Rusiyede ve işğal etilgen Qırımda ötkerilgen edi ve Ukraina ile bir sıra Ğarp devletleri tarafından tenqid etildi. ABD, Kanada, Frenkistan, İsveçiya, Büyük Britaniya, Almaniya, Çehiya, Türkiye ve bir sıra başqa memleketler qanunsız istilâ etilgen yarımadada ötkrilgen saylavlarnıñ qanuniyetini tanımağa red etti.
Ukraina Yuqarı Radası sentâbrniñ 20-nde işğal etilgen Qırımda ötkerilgen saylavlarnıñ ve bütün Rusiye Devlet Duması erkânınıñ tanılmağanı aqqında qarar qabul etken edi.
İyülniñ 1-nden başlap Ukraina Qara deñiz iqtisadiy emekdeşlik teşkilâtında (QDİET) reberlik yapmaqta. QDİET terkibine Qara deñiz etrafındaki ve Cenübiy Balkanlarnıñ 12 devleti kire. Teşkilât 1992 senesi tesis etilgen edi. Onıñ maqsadı – Qara deñiz havzasınıñ devletlerinde iqtisadiy inkişaf ve ilerilemeni teminlemektir.
