Qomşu Rusiyeniñ Moskvadaki Yuqarı mahkemesi aqyarlı «Hizb ut-Tahrir davasınıñ» mabüsi Ruslan Zeytullayevniñ ükmünden berilgen şikâyet arizasını iyül ayınıñ soñunda baqacaq. Bunı advokat Emil Kürbedinov iyülniñ 6-da Qırım.Aqiqatqa bildirdi.
«Moskva şeeriniñ Rusiye Yuqarı mahkemesi iyülniñ 27-de saat 10-da Rostov-na-Donu şeeriniñ Şimal-Kavkaz bölge arbiy mahkemesiniñ «Ruslan Zeytullayevniñ davası» boyunca çıqarğan ükmünden berilgen şikâyet arizalarını baqacaq. Güzel bir şey olacağını tüşünmeymiz. Mahkeme eski ükümni deñişmesiz qaldırsa daa bir qarar», – dedi Kürbedinov.
Onıñ aytqanına köre, Zeytullayev üçünci kere açlıq ilân etkenini bilmey.
Ruslan Zeytullayev şikâyet arizalarınıñ baqılması ögüne üçünci açlıq ilân etecegini bildirgen edi.
«Hizb ut-Tahrir davasınıñ» mabüsi Ruslan Zeytullayev mayısnıñ 26-da mubarek Ramazan ayında oraza tutmaq içün açlıqnı toqtattı.
Ekinci açlıqqa evelkinden 19 künden soñ başladı.
Birinci açlıqnı aprelniñ 4-de Rostov-na-Donudaki Şimal-Kavkaz bölge arbiy mahkemesinde üküm çıqarılğanına qadar ilân etken edi.
Aprelniñ 26-da Rusiyeniñ Şimal-Kavkaz bölge arbiy mahkemesi «Hizb ut-Tahrir davasınıñ» mabüsi Ruslan Zeytullayevni 12 yılğa azatlıqtan marum etti.
Rostov-na-Donu şeerindeki Şimal-Kavkaz bölge arbiy mahkemesi 2016 senesi sentâbrniñ 7-de Zeytullayevni «terrorist cemiyette iştirak etkeninde» qabaatlı olaraq tanıp, oña 7 yıl apis cezasını berdi. Rusiye prokuraturası Rusiye Yuqarı mahkemesiniñ bu qararına itiraz bildirdi ve dava tekrar baqılması içün kene Şimal-Kavkaz bölge arbiy mahkemesine qaytarıldı. Taqiqat organları Zeytullayevnıñ terrorist cemiyet iştirakçisi degil de, teşkilâtçı olaraq tanılmasını istey. Rusiye Ceza Kodeksiniñ bu maddesi eñ azından 15 yıl ve atta ömür boyu apis cezasına ketirmek mümkün.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
