İşğal altındaki Qırımda Rusiye uquq qoruyıcıları Bağçasarayda qırımtatarlarnıñ evlerinde keçirilgen tintüvlerniñ daa eki şaatına qarşı memuriy protokollar tizdi. Bunı Qırım faali Server Mustafayev iyülniñ 6-da Qırım.Aqiqatqa bildirdi.
«Belâlovlar Emin ve Emil – tintüvler vaqtında olğan tedbirlerde er vaqıt iştirak ete. Yerli uquq qoruyıcılar ne içündir olarnı saylap aldı. Olar içün qanunsız miting boyunca bam-başqa bir memuriy dava ola. Tünevin (iyülniñ 5-de – QA) taqiqatçı olarğa celpname berip, ertesi künü saat 9-da Bağçasaray rayonınıñ İçki işler bölügine memuriy protokol tizilmesi içün çağırdı. Olar bunı bugün yapqanlar», – dedi o.
Onıñ aytqanına köre, tizilgen memuriy protokol boyunca mahkeme cumaaqşamı künü, iyülniñ 6-da, olmalı, lâkin advokatlar dava malümatlarını bilmek içün onı başqa saatqa avuştırmağa rica ete.
İyünniñ 28-de Qırım faali Server Mustafayev Osman Belâlov «qanunsız mitingde» iştirak etkeni içün 30 künge apiske alına ya da 150 biñden 300 biñ rublege qadar (66 biñden 132 biñ grivnağa qadar – QA) para cezasını ala bile, dep bildirgen edi.
Martnıñ 7-de Kreml kontrol etken Qırım mahkemesi Bağçasarayda keçirilgen tintüvlerniñ şaatı Osman Belâlovnıñ şikâyet arizasını qanaatlendirmedi. Onı qanunsız kütleviy aktsiyada iştirak etmesinde qabaatlaylar.
Yanvar ayınıñ soñunda Bağçasaraydaki Rusiye mahkemesi Osman Belâlovğa 10 biñ ruble miqdarında para cezasını berdi.
Mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
