Qırımtatar milliy areketi liderleriniñ birisi Ahtem Çiygozğa qarşı mahkeme esnası vaqtında 200-den ziyade insan sorğuğa çekildi. Tek bir kişi Çiygozğa qarşı şaatlıq etti, bunıñ sebebi de Qırımtatar Milliy Meclisinden nefret etkeni olğan. Qalğanları, «halq göñüllileri» bile, Çiygozğa qarşı bir şey aytmadı.
Bunı Rusiye advokatı, Ahtem Çiygoznıñ imayecisi Nikolay Polozov ZİK telekanalında Tatyana Danilenkonıñ FACE 2 FACE yayınında bildirdi.
Nikolay Polozov Ahtem Çiygoz üzerinde mahkeme esnası bir yıldan berli devam etkenini ve bu müddet devamında büyük iş yapılğanını hatırlattı.
«Bu müddet devamında Çiygoz davasında tahminen 200 insan sorğuğa çekildi: zarar körgenler, şaatlar, hain çıqqan Tsekov, Kovitidi, Aksenovnı bile sorğuğa çektik, bu künleri ise vaqialarnıñ esas iştirakçileriniñ birisi Konstantinov da sorğuğa çekilecektir», – dedi Polozov.
Advokatnıñ qayd etkenine köre, bundan evel işğal etilgen Qırımnıñ sabıq prokurorı Natalya Poklonskaya, Kreml kontrol etken Qırım yolbaşçısı Sergey Aksenov ve Qırım parlamentiniñ spikeri Vladimir Konstantinov Ahtem Çiygoznıñ davasınen meraqlanğan ediler. Lâkin, Polozovnıñ aytqanına köre, şimdi bütün mesele Kremlnen bağlı oldı.
«Ahtem Çiygoz davası bir qaç sebepten müimdir. Birinciden, o, Qırımtatar Milliy Meclisiniñ reis muavini ola, bundan ğayrı, Çiygoz taqiqat izolâtorında tutulğan yekâne Meclis vekilidir. Hatırlatayım, Ahtem Çiygoz 2,5 yıldan berli apiste yata. Bundan ğayrı, soñki yıl devamında onı andan çıqarmadılar. Mahküm etilgen kişi oturış salonında olmağan bu esnas Rusiyede birinci sayıla. Çiygoz içün video bağı teşkil etildi, lâkin mahkeme oturışında o yoq, böylece, esnas daa çoq zorlaştırıla», – dep qayd etti Çiygoznıñ imayecisi.
İyülniñ 5-de Aqmescitniñ apellâtsion mahkemesi qırımtatar milliy areketi liderleriniñ birisi Ahtem Çiygoznıñ imayesi apiste yatma müddetiniñ yazatılmasından bergen şikâyet arizasını red etti. Böylece, Çiygoz oktâbrniñ 8-ne qadar apiste qalacaq.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
