Qırımnıñ sabıq kurort ve turizm naziri Aleksandr Liyev Ukaina Milliy cemaat teleradiokompaniyasınıñ icracı müdiri vazifesine keçti. Bunı o öz Facebook saifesinde haber etti.
«Kompaniyanıñ memuriy ve iqtisadiy faaliyeti menim mesuliyetimde keçecek. Kolektiv tarafından nasıl şekilde qarşılanılğanıma pek sevindim! Endi ümütlerni kerçekleştirmek mecburım. Vazifeler büyük ve episi acele (er vaqıtki kibi). PAC «UMCT» şimdi endi qanun seviyesinde tasdiqlanğan şekilde islâ etilmesine azırlanılmalı ve deñiştirilmeli. Bügün bu teleradiokompaniya, mülk ve hadim sayısına köre, Ukrainada eñ büyüktir. Teessüf ki, eñ semereli olğanını aytmağa daa erte», – dep yazdı o.
Liyevniñ sözlerine köre, o turizm saasını bıraqmaycaq, çünki memleket içinde turizmnıñ inkişafı ve içtimaiy yayınlavnıñ inkişavı arasında iç bir zıddiyet yoqtır. Bundan evel Aleksandr Liyev Musafirçenlik sanayı birliginiñ yolbaşçısı vazifesinde çalışa edi.
Aleksandr Liyev Qırım Muhtar Cumhuriyetiniñ Kurort ve turizm naziri edi ve yarımada akimiyetiniñ başqa vazifelerinde de çalışqan edi. Qırım Rusiye tarafından işğal etilgen soñ o Ukrainanıñ esas qısımına köçti.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
