Kremlniñ itaatındaki Qırım mahkemesiniñ nevbetteki toplaşuvında, qırımtatarlarnıñ yetekçilerinden biri İlmi Umerovnıñ davası baqılır eken, mahkemeciler davanıñ malümatını diñlemege devam etti. Ve bu toplaşuvda, Umerovnıñ sözlerine köre, davanıñ malümatında keçken onıñ sözleri prokuror tarafından seslendirilmey edi.
«İlân etken vaqıtta o (prokuror – QA), mezkür TV programması devamında Umerovnıñ aytqan sözleri añılğan yerlerni oqumamağa tırışa edi. O sözlerni daqqalarğa böldi, ve er sefer ayta edi: felân daqqada qadın qonuşa, felân daqqada ise erkek qonuşa. Tam olaraq neler aytılğanını ise iç te seslendirmey edi. Men bellesem, olar, qırımtatar tilinden degil de, bunıñ yerine pek te añlaşılmağan tercimeden ekspertiza keçirmeknen, büyük hata yapqanlarını özleri de añlağandır», – dedi Umerov.
O qayd etti ki, o tercime «keyfiyetsiz ve ihtisassız» yapılğanını tüşüne.
«Oña transcript deñilmez, sözme-söz tercime degildir, semantik tercime de dep adlandırılmaq mümkün degil. Bizler terciman meselesine kelgende, bellesem, biz bu mevzuda ciddiy qonuşırmız. Şimdilik bu ceryan müim olmağan kiçik şeylerde battı», – dep qoştı Umerov.
İyülniñ 5-nde, çarşenbe künü, advokat Mark Feygin dedi ki, imaye tarafı, FSB tarafından ekspertizanıñ keçirilmesi içün maznunnıñ nutuğını tercime etken terciman sorğuğa çekilecegini bekley. Mark Feyginniñ sözlerine köre, bu «müim protsessual bir kün» olacaq.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
