Kremlniñ nezaretindeki Qırım İçki siyaseti, informatsiya ve rabıta nazirligine itaat etip çalışqan «Pervıy krımskiy» telekanalınıñ hadimlerine tölenilgen maaşlar eksildi. Bunı Qırım.Aqiqatqa kanalnıñ hadimlerinden biri tarif etti.
«Evel aylıq maaşı orta esapnen 20-25 biñ ruble etrafında olsa, şimdi – 15-17 biñ ruble. Bonuslar artıq berilmey», – dedi subetdeşimiz.
Telekanal hadiminiñ sözlerine köre, idareciler maaş eksilmesiniñ sebeplerini añlatmadı.
İşğal etilgen Qırımda eki yıldan ziyade çalışıp, Rusiye tarafdarlarınıñ malümatını qırımtatar tilinde yayınlağan «Millet» telekanalında da aylıqlar eksildi. Bu müessiseniñ hadimlerinden biri maaşlar orta esapnen 50% qısqartılğanını bildirdi. Hadimlernin bir qısımı «Millet» TV kanalını terk etti.
Kreml tarafından tain etilgen Qırım yolbaşçısı Sergey Aksönovnıñ fermanı ile 2015 senesi aprel 22 künü «Cemaat qırımtatar teleradiokompaniyası» kârsız ayrı teşkilât meydanğa ketirilgen edi, onıñ adı «Millet» ve «Vetan sedası» radiosı oldı. Avgust 28 künü Roskomnadzor bu teşkilâtqa yayınlav içün litsenziya berdi. 2015 senesi sentâbr 1 künü «Millet» telekanalı deñeme şekilinde yayınlarını başlatqan edi.
