Qırımtatar halqınıñ lideri Mustafa Cemilev iyülniñ 4-de Türkiye Cumhuriyeti prezidenti Recep Tayyip Erdoğan ile körüşip, Qırımda insan aqlarınıñ bozulması, Qırımtatar Milliy Meclisi vekilleriniñ Qırımğa kiriş yasaqlarınıñ lâğu etilmesi ve siyasiy mabüslerniñ azat etilmesini laf etti.
Meclis saytında berilgen malümatqa köre, Türkiye prezidenti Ukraina topraq bütünligi mevzusında fikri deñişmegenini qayd etti. O, Türkiye akimiyeti türk gemileriniñ Qırım limanlarına kirmemesi içün tedbir alğanında işandırdı.
Yanvarniñ 17-de Türkiye Tışqı işler naziri Mevlüt Çavuşoğlu Ankara aliy oquv yurtlarınıñ ocalarınen körüşip, Ankara Qırım meselesinde aynı fikirde qalğanını bildirgen edi. Türkiye naziriniñ aytqanına köre, Türkiye ve Rusiye munasebetleri eyilişse de, Qırım meselesinde bir deñişme olğanını ifadelemey.
Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı.
Bunıñnen beraber, TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
