Link açıqlığı

Faaller özüni qırımtatarlarnıñ aqları içün ateşken bergen Musa Mamutnıñ qorantasına yardım etmege çağırdı


Musa ağa Mamutnıñ torunları Musa (13 yaşında), Enver (12 yaşında) ve Sabri (5 yaşında) ve qızı Dilâra hanım evniñ yanında

Qırımda 1978 senesi Sovetler Birliginde qırımtatarlarnı ırq ayırımına oğratqanları içün özüni ateşken bergen qırımtatar faali Musa Mamutnıñ qorantasına maddiy yardım köstermege teklif eteler.

Qırım blogeri Zair Akadırovnıñ iyülniñ 4-de tarif etkenine köre, Musa Mamutnıñ ailesi Aqmescit rayonınıñ Beş Terek (Donskoye) köyünde tamir etilmesi kerek olğan evde otura. Mamutnıñ oğlu Yunus 49 yaşında olğanda hastalıqtan vefat etti, ömür arqadaşı 5, 12 ve 13 yaşında üç balasınen qaldı. Qadın evni tamir etmek içün özü para toplap olamay.

«Evniñ tavanları aslanıp tura, divarları töküle. Bazı odalarda qalmağa havflı ola. Evde balalar yaşay, bu sebepten Mamut qorantası içün ilk evelâ bu meseleniñ çezilmesi kerek. Amma er şey parağa bağlı. Evni baqqan qurucınıñ aytqanına köre, damnı deñiştirmek içün 700 biñ ruble (tahminen 300 biñ grn – QA) kerek. Çağına yetmegen üç oğlan bar, bu para az degil... Qırımtatar halqınıñ tuvğan topraqta yaşaması içün canını feda etken Musa ağa Mamutnıñ tuvğanlarına yardım eteyik», – dedi Akadırov.

Musa Mamut 1931 senesi fevralniñ 20-de Qırımdaki Balıqlava rayonınıñ Uzuncı köyünde dünyağa keldi. 1944 senesi qorantası andan sürgün etildi. 1975 senesi aprel ayında Musa Mamut qorantasınen beraber Qırımğa qaytıp, Beş Terek köyünde ev satın ala. Lâkin satın alğan evni resmiyleştirmey ve qorantasını qayd etmeyler. Musa ve ömür arqadaşı Zekiyeni pasport rejiminiñ bozulmasında qabaatlap, cinaiy iş açtılar.

1976 senesi aprelniñ 23-de Musa apiske alındı, Aqmescit rayon mahkemesi pasport rejiminiñ bozulması içün oña eki yıl apis cezasını bergen. Apayına eki yıl şartlı olaraq berildi.

1978 senesi iyünniñ 20-de Musa ve ömür arqadaşını tekrar pasport rejiminiñ bozulmasında qabaatlap, yañı cinaiy iş açtılar. İyünniñ 23-de saba militsiya hadimi onı taqiqatçığa alıp ketmek içün evine kelgende Musa Mamut üstüne benzin tökip özüni yaqtı. 1978 senesi iyünniñ 28-de Aqmescit hastahanesinde alğan yanıqlardan can bergen edi.

XS
SM
MD
LG