Link açıqlığı

Keçken oquv yılı devamında Aluştada 565 bala – tasil müessiseleriniñ talebeleri, ukrain tilini ögrene edi. Bu esapqa ukrain tilini ders olaraq ve derslerden haric öz isteginen ögrengen ballarnıñ sayısı kire. Böyle malümat Aqmescitniñ Ukrain medeniy merkeziniñ reisi Leonid Küzminniñ resmiy muracaatına cevap olaraq Kremlge itaat etip çalışqan Aluşta şeer memuriyeti tarafından berildi. Fail bu vesiqanıñ suretini Facebookta paylaştı.

«2016/2017 oquv yılı devamında Aluşta şeeriniñ umumtasil müessiselerinde talebelerge ukrain tilinde tasil almaq aqqı berilgen edi: ders olaraq BTM «Mektep-kollegium» esasında – 322 talebe sayısında 15 sınıf; BTM «Partenit mektebinde» – 111 talebe sıyısında 6 sınıf; derslerden haric faaliyet olaraq BTM «№ 3 Mektepte» 52 talebe bilgi aldı», – dep aytıla bildirüvde.

Bundan evel aynı bu kibi muracatlarnı Leonid Küzmin Kremlniñ nezaretindeki Kezlev, Yalta ve Aqmescit memuriyetlerine yollap, cevap alğan edi.

Qırım uquqqorçalav gruppasınıñ aprel ayında derc etken közetüv esabatında, işğal etilgen Qırımda ukrain tilinde tasil alğan talebelerniñ sayısı, 2013 senesine nisbeten, 36 defa eksik olğanı, ukrain tilinde tasil bergen sınıflarnıñ sayısı ise 31 defa eksilgeni yazıla. Şimdi Qırımda ukrain tilinde tasil alğan talebelerniñ sayısı, umumiy sayıda 0,1% teşkil ete.

Yarımadada ukrain tilinde tasil bergen bir mektep qaldı – Kefede № 20 mektep. Onda 9 sınıf çalışa ve 132 talebe oqıy. Rus tilinde tasil bergen 12 mektepte episi olıp 19 ukrain sınıfı çalışa. Olarada 139 talebe tasil ala, dep bildirgen edi Kremlniñ nezaretinde çalışqan Qırım Tasil, ilim ve gençlik naziri Natalya Gonarova.

İşğal başlanğanda Qırımda 14 mektep qırımtatar tilinde tasil bere edi, daa 7 mektep – ukrain tilinde. Şimdi bu tillerni ancaq ana-babalarnıñ mektep müdiri adına yazğan mahsus muracaatları sayesinde ögrenmege mümkün ola.

XS
SM
MD
LG