Link açıqlığı

Çiygoz anası vefat etkeni munasebetinen qoltutqan semetdeşlerine minnetdarlıq bildirdi – ömür arqadaşı


Ahtem Çiygoz, arhiv fotoresimi

Qırımtatar milliy areketi liderleriniñ birisi Ahtem Çiygoz anası Aliye Çiygoz vefat etkeni munasebetinen qoltutqan ve cenazege kelgen semetdeşlerine minnetdarlıq bildirdi. Bunı Çiygoznıñ ömür arqadaşı Elmira Ablâlimova Ahtemnen taqiqat izolâtorında körüşken soñ Facebookta yazdı.

«Şübesiz, o, busandı, lâkin sabır ete. O, halqına minnetdarlıq bildirgenini ve iç bir vaqıt qoltutacağından şübelenmegenini ayttı. Rahmetli Aliye hanımnıñ eki oğlunıñ vazifesini biñlernen semetdeşi becerip, onı lâyıq bir şekilde soñki yolğa ozğardılar», – dep yazdı Ablâlimova.

Bağçasaray rayonınıñ Topçiköy (Dolinnoye) köyünde iyülniñ 2-de qırımtatar milliy areketi liderleriniñ birisi Ahtem Çiygoznıñ anası Aliye Çiygoz ile vedalaştılar. Cenazede 500-den ziyade insan bar edi.

Ahtem Çiygoznı anasınıñ cenazesine yibermediler, ömür arqadaşı ve cemaat imayecisi Elmira Ablâlimovanıñ muracaatını Aqmescit SİZOsı qabul etmedi.

İyünniñ 15-de Kreml kontrol etken Qırım Yuqarı mahkemesi eki buçuq yıldan berli SİZOda yatqan Ahtem Çiygoznıñ imayesi bergen hasta anasınen körüşme muracaatını red etken edi.

Bundan evel Qırımtatar Milliy Meclisiniñ reisi, Ukraina halq deputatı Refat Çubarov Qırımnıñ siyasiy mabüsi Ahtem Çiygoznıñ anası hasta olğanını haber etken edi.

İyünniñ 20-de Ahtem Çiygoznı Aqmescit SİZOsından gizli şekilde çıqarıp, Bağçasarayda hasta anasınen körüşmege imkân berdiler. Ahtem Çiygoz izolâtorğa keri ketirildi, anasınen körüşken soñ mahkeme oturışına devam etip olamadı.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG