Kreml kontrol etken Qırım ve Aqyar musulmanları diniy idaresi (QAMDİ) Oraza bayramı munasebetiniñ Qırım apishanelerinde tatlı sofra donattı, dep bildirdi iyülniñ 3-de QAMDİ matbuat hızmeti.
«Bayram merasimleri Aqmescitteki 1 nomeralı apishanede ve SİZOda, em de Keriçteki 2 nomeralı apishanesinde olıp keçti. Qırım ve Aqyar musulmanları diniy idaresiniñ vekilleri musulmanlarnıñ bayramını tebrikledi. Aqmescit imamı Muhammed İslamov apiste yatqanlarğa Qırım müftisi acı Emirali Ablayevniñ sağlıq, qorantalarınen tezce qavuşma ve cemiyetniñ vatandaşları olma tileklerini yetkizdi. Apiske alınğanlar içün tatlı sofra donatıldı», – dep aytıla haberde.
Oraza bayramı – islâm taqviminiñ eki büyük bayramınıñ birisidir. Bu sene iyünniñ 25-de qayd etildi.
QAMDİ 2014 senesi Qırım Rusiye tarafından işğal etilgen soñ yapacaq areketlerini Meclis ile muzakere etmey. Yanvarniñ 16-17-de Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı. 2016 senesi noyabrniñ 19-da 14 qırımtatar din cemiyeti Kyivde toplaşıp, müftiylikni qurdılar. Müfti Ayder Rustamov oldı, o, Kyivdeki qırımtatar cemiyeti yanında Musulmanlarnıñ diniy qıymetleri komitetiniñ yolbaşçısı ola. Alimler şurası da quruldı, onıñ yolbaşçısı olaraq Ukraina musulmanları birliginiñ reisi Suleyman Hayrullayev saylandı.
