Link açıqlığı

Ukraina prezidenti Petro Poroşenko ABD Temsilciler palatası ABD Senatınıñ Rusiyege qarşı sanktsiyalarnı kenişletme ve quvetleştirme qanun çıqarıcı teşebbüsine qoltutar, dep ümüt ete. Bunı o Amerika Birleşken Devletleri Kongressiniñ eyyeti ile körüşip ayttı.

Prezident memuriyetiniñ matbuat hızmeti bildire ki, Poroşenko ABD Kongressine Ukrainağa Rusiye istilâsına qarşı çıqmağa ve islâatlarnı kerçekleştirmege köstergen eki firqalı yardımı içün teşekkürler bildirdi.

Mezkür körüşüvde Ukraina mudafaasınıñ pekitilmesi, ABD bücetinde Ukraina havfsızlığınıñ maliye etilmesi muzakere etiildi.

İyün ayında Amerika senatorları Rusiyege qarşı sanktsiyalarnı kenişletken İranğa qarşı sanktsiyalarğa dair qanun leyhasınıñ deñişmelerine qoltuttı. Bunıñ maqsadı Moskvanı 2016 senesi ABD prezident saylavlarına kirişkeni, Qırımnı işğal etkeni ve Suriyede altı yıl devam etken cenkte ükümetke qoltutqanı içün cezalamaqtır. Qanun leyhası Beyaz Sarayğa Kongress qararı olmasa, santsiyalarnı yımşatmağa, toqtatmağa ve lâğu etmege yasaq ete.

ABD, Avropa Birligi ve diger ğarp memleketleri Rusiyege qarşı bir qaç kere sanktsiyalarnı kirsetken ediler. Başta Qırım işğali, soñra Donbasstaki silâlı zıddiyette Moskva alğan rolü sebep olğan edi.

XS
SM
MD
LG