Rusiye advokatı Mark Feygin ukrain advokatları cedveline bergen vesiqaları yeterli olmağanı içün kirsetilmey. Bunı Ukraina advokatları milliy birliginiñ matbuat hızmeti iyülniñ 3-de Qırım.Aqiqatqa bildirdi.
«Feygin bütün vesiqalarnı bergen edi, qarar alınğan edi. Lâkin biz bütün vesiqalarnı elde etmedik. Kyiv advokatları şurası eksik olğan vesiqalarnı yollamalı. Şimdilik bunı yapmadı», – dep qayd etti matbuat hızmeti.
Ukraina advokatları birliginiñ bildirgenine köre, çetel advokatı Ukrainadaki cinaiy davalarda iştirak etecek olsa, o, ukrain advokatları cedveline kirsetilmeli.
«Biz onıñ (Mark Feyginniñ – QA) qayd olma maqsadını bilmeymiz. Advokatlar bunı haber etmey. Oğraşqan davalarnı da bilmeymiz. Amma ukrain advokatı Ukraina advokatları cedvelinde olmasa, cinaiy davalarda iştirak etmege aqqı yoq. Çetel devletniñ advokatı da aynı, Ukrainadaki davalarda iştirak etecek olsa, cedvelge malümat kirsetmeli», – dep ayttılar matbuat hızmetinde.
Bundan evel Mark Feygin Ukraina tarafınıñ qararı bar olğanına baqmadan, onıñ çetel advokatı olaraq ukrain cedveline kirsetilmesine keder eteler, dep bildirgen edi. Onıñ aytqanına köre, işğal etilgen Qırımda mahküm etilgen qırımtatar milliy areketi liderleriniñ birisi İlmi Ümerovnı qorçalamaq içün o mezkür cedvelde qayd olmaq kerek.
İyünniñ 30-da advokat Mark Feygin bildirdi ki, Qırımda Ümerovnıñ davasını baqqan «qadınıñ çift vatandaşlığına dair vesiqalarnı Ukrainada alacaq ola».
Advokatnıñ qayd etkenine köre, işbu vesiqalarnı ukrain cedvelinde çetel advokatı olaraq qayd olğan soñ elde etmek mümkün.
İyün ayınıñ ortasında Kreml kontrol etken Aqmescit rayon mahkemesiniñ oturışında Ümerovnıñ advokatı Mark Feygin qadı Andrey Küleşovdan çift vatandaşlığı bar olğanına dair malümat bermesini talap etti. Feyginniñ aytqanına köre, «çift vatandaşlığı olğan insan adaletni temsil etemez».
Ukraina 2014 senesinden soñ qırımlılar Rusiye pasportlarını basqı altında almağa mecbur edi, dep bildire. Kyiv qırımlılarnı işğal etilgen topraqta yaşağan Ukraina vatandaşları olaraq tanıy. Qırımnıñ Rusiye qurulışlarında çalışmağa qalğan qadı, devlet işçileri, uquq qoruyıcılar Ukraina pasportlarını teslim etken edi.
Ukraina adalet şurası Ukrainağa ant etip Rusiye tarafına keçken 276 Qırım qadısınıñ işten boşatılmasına qoltuttı.
2016 senesi FSB taqiqatçıları İlmi Ümerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, Meclis reisiniñ muavini İlmi Ümerovnıñ tutulması, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Ümerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, manalarnı qarıştırğanını ayta.
