Rusiye baş naziri Dmitriy Medvedev, işğal etilgen Qırımda ve Aqyarda ana sermiyasını qullanmaq aqqını bermeknen bağlı qaidelerniñ deñiştirilmesine dair qanun leyhasını Devlet Dumasına kirsetmege emir etti. Bu aqta vesiqa iyülniñ 4-nde Rusiye akimiyetiniñ sitesinde yerleştirildi.
Qanun leysına binaen, 2007 senesi yanvarniñ 1-i ve 2014 senesi yanvarniñ 18-i arasında balanıñ anası keçingen olsa, ana sermiyası dul babağa berilmek kerek.
«Qanun leyhası, 2007 senesi yanvarniñ 1-i ve 2014 senesi yanvarniñ 18-i arasında, Rusiye vatandaşı olmayıp Qırımda yaşağan qadın, ekinci, üçünci ya da ondan soñraki balanıñ doğuvından (qabul etüvinden) soñ keçingen ya da ölü ilân etilgen olsa, oña ait ana sermiyasını qullanmaq aqqını balanıñ tul qalğan babasına, ya da tam zamanlı tasil müessisesinde oquşı bitkenine qadar (amma 23 yaşından büyük olmasa) yetim ballarğa qullamağa izin bermege teklif ete», – dep yazılğan mezkür vesiqada.
Rusiye akimiyetiniñ toplaşuvında işbu qanun leyhası 2017 senesi iyünniñ 29-nda tasdiqlanğan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
