İyünniñ 30-dan iyülniñ 5-ne qadar Odessada keçirilgen 6-ncı Halqara islâmşınaslıq mektebi iştirakçileriniñ maruzalarından Qırım mevzusı ayrı bir yer aldı. Bunı «Umma» Ukraina musulmanları diniy idaresiniñ müftisi, forum iştirakçisi Said İsmagilov Qırım.Aqiqatqa bildirdi.
«Qırımda islâm ve Qırımdan çıqqan musulmanlar meselesi mektebimizde baqıla. Öz çıqışımda olğan esnaslar aqqında aytacam, diger alimler de sözge çıqacaq. Maruzalar arasında Qırımda islâm mevzusına bağışlanğan tedqiqatlarnen bağlı soyları da bar. Belli alim Mihail Yakuboviç çıqışta bulundı, islâmşınaslıq mektebiniñ birinci ve ekinci künlerinde eki lektsiyası oldı. Çıqışlarnıñ büyük qısmını Qırımda qalğan ve onıñ tışına çıqqan musulmanlarğa ayırdı», – dedi İsmagilov.
Onıñ qayd etkenine köre, Qırım mevzusı mektep iştirakçileriniñ tedqiqatlarında adet üzre mevcut.
6-ncı Halqara islâmşınaslıq mektebi Odessadaki İslâm medeniyet merkezinde «Zemaneviy dünyada islâm: tarihiy, medeniy, intellektual boşluq» şiarı altında keçirile. Ukraina, Azerbaycan, Belçika, Poloniyadan kelgen otuzdan ziyade kişi iştirak ete. 2017 senesi bu ilmiy forum Ukrainanıñ islâmşınaslıq tedqiqatları merkezi, «Alraid» bütünukrain birligi ve Halqara islâm tüşüncesi institutı (ABD) tarafından teşkil etildi.
