Qırımtatar Milliy Meclis rwisi Refat Çubarov, qırımtatat yazısını kiril urufatından bütünley latin urufatına keçirmek içün Ukraina akimiyetiniñ qararı qabul etilmek kerek olğanını bildirdi. Bunı o Qırım.Aqiqatqa bergen izaatında bildirdi.
Çubarov qayd etti ki, Qırımda 90-cı yıllarnıñ ortasında Qırım Muhtar Cumhuriyetiniñ Yuqarı Şurası tarafından qabul etilgen qarardan soñ latin urufatına keçüv başlanğan edi, lâkin Qırım Rusiye tarafından istilâ etilgen soñ bu iş toqtadı.
«Er alda, devletniñ resmiy izini noqta-i nazarından bu meselede toqta qoyulmaw kerek. Ve Nazirler Şurasınıñ qararı qabul etilmeli», – dedi Çubarov.
Onıñ sözlerine köre, qırımtatar yazasınıñ latin urufatına keçirilmesi meselesinde memurlarnıñ fikirleri farqlana.
«Nazirler Şurasında bazı memurlar dey ki: «Elifbeni tasdiqlamaq aqqımız barmı eken?» Yeter ki – siz qabul etiñiz», – dedi o.
Meclis reisi böyle davranışnı «aynecilik» olaraq tanıttı, çünki akimiyetniñ qararı olmasa dersliklerni bir elifbeden başqasına çevirmege mümkün degil. Ve o dedi ki, o qırımtatar yazısınıñ latin urufatına keçirmeknen bağlı işniñ toqtatılmasını Ukraina Tasil ve ilim naziriniñ şahsiyetinen bağlamay.
2015-2016 seneleri devamında Ukraina Tasil ve ilim nazirliginde qırımtatar yazısını latin urufatına keçirmek azırlıqlarınen oğraşqan gruppa çalışa edi. Bu gruppanıñ yolbaşçısı olğan Nazirniñ sabıq mesleatçısı Elhan Nuriyevniñ bergen malğmatına köre, nazir vazifesine Liliya Grineviç tainlengen soñ bu gruppanıñ işi toqtatılğan.
