Link açıqlığı

Çiygoznıñ ömür arqadaşı ve advokatı Kyivde Klimkin ve Lutkovskayanen körüştiler


Qırımtatar milliy areketi liderleriniñ birisi Ahtem Çiygoznıñ ömür arqadaşı Elmira Ablâlimova, advokatı Nikolay Polozov ve qırımtatarlarnıñ lideri Mustafa Cemilev iyünniñ 30-da Kyivde Ukraina Tışqı işler naziri Pavlo Klimkin ve ukrain ombudsmeni Valeriya Lutkovskaya ile körüştiler. Körüşüvler Strasburgda PACEde keçirilgen Qırım tedbirleri, şu cümleden işğal etilgen yarımadada olğan siyasiy taqiplerge bağışlanğan tedbirlerde qaytqanda olıp keçti.

Nikolay Polozovnıñ Facebookta bildirgenine köre, Klimkin ve Lutkovskayanen beraber Çiygoz davasını ve onı azat ettirmek içün yapılacaq areketlerni muzakere ettiler.

«Halqara qurulışlardan Kremlniñ siyasiy mabüslerinen bağlı «faal areket» yapmasını talap etip, Ukrainanıñ rolü büyük olğanını unutmamaq kerek», – dep aytıla Ukraina prezidenti qırımtatar halqı işlerinden vekâletlisi Mustafa Cemilevniñ matbuat hızmeti derc etken haberde.

İyünniñ 28-29-da Avropa Şurası Parlament assambleyasında «Qırım künleri» keçirildi. Qırımnı bir qaç Ukraina halq deputatı, siyasiy erbap, faal ve uquq qorçalayıcılar, şu cümleden Ahtem Çiygoznıñ ömür arqadaşı temsil ettiler. O, PACE deputatlarına Çiygoznıñ muracaatını seslendirdi.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG