Rusiye Federal havfsızlıq hızmeti bildire ki, Herson vilâyetiniñ Qırımnıñ memuriy sıñırına yaqın bir yerde yaqalanğan Rusiye sıñırcıları «yolunı coydı». Bunı iyünniñ 30-da Rusiye kütleviy haber vastaları Qırımdaki Rusiye FSB sıñır idaresiniñ malümatına esaslanıp bildire.
«İyünniñ 29-dan 30-na keçer gecesi Ermeni Bazar şeeri civarındaki Rusiye-Ukraina sıñırında keçirilgen talimler vaqtında idareniñ eki hadimi yolunı şaşırıp, Ukraina tarafına çıqtı, anda ise qomşu devletniñ sıñır bölüginiñ vekilleri tarafından yaqalandı», – Rusiye idaresiniñ malümatına esaslanıp bildire TASS.
Hızmetniñ malümatına köre, Rusiye sıñırclarınıñ keri qaytarılması baqıla ve halqara qanunlarnıñ aytılmağan qaidelerine esaslana, dep bildire Rusiyeniñ «İnterfaks» neşiri.
İyünniñ 30-da Kalançak mahkemesi iyünniñ 30-na keçer gecesi Herson vilâyetinde yaqalanğan Rusiye Federal havfsızlıq hızmeti sıñır bölüginiñ eki hadimini 15 künge apiske ald.
Cuma künü, iyünniñ 30-da, Ukraina Devlet sıñır hızmetiniñ reisi Viktor Nazarenko iyünniñ 30-na keçer gecesi Herson vilâyetinde Rusiye Federal havfsızlıq hızmeti sıñır bölüginiñ eki hadimi yaqalanğanını bildirdi.
Devlet sıñır hızmeti Rusiye Federal havfsızlıq hızmeti sıñır bölüginiñ hadimleri muracaat yollap, yaqalanğan eki Rusiye askeri aqqında malümat bermege rica ete, dep bildirdi.
