Link açıqlığı

Türkiyeniñ Bursa şeerinde Ukrainanıñ Fahriy konsullığı açıldı


Türkiyeniñ Bursa şeerinde iyünniñ 29-da Ukrainanıñ Fahriy konsullığı açıldı. Bunı İstanbuldaki sabıq Ukraina baş konsulı, Ukraina Tışqı işler nazirligi departamentiniñ müdiri Vasıl Bodnar Facebook saifesinde yazdı.

Onıñ aytqanına köre, tedbirde Ukraina Tışqı işler naziriniñ birinci muavini Vadim Pristayko iştirak etti.

«Ukraina Tışqı işler naziriniñ birinci muavini Vadim Pristayko Fahriy konsul Gerhem Şehsuvarğa konsul patentini berdi. O, Bursanı ziyaret etip, «Ukrainanıñ dünyağa ediye etken 50 icadı» sergisiniñ açılışında iştirak etti», – dep qayd etti Bodnar.

İyünniñ 29-da Vadim Pristayko yolbaşçılığında Ukraina eyyeti Türkiyede bulundı. O, Qara deñiz İqtisadiyat İşbirligi Teşkilâtınıñ 36-ncı nazirler şurası toplaşuvında iştirak etip, Türkiyeden Teşkilât reisi vazifesini elde etti.

2017 senesi iyülniñ 1-den başlap dekabrniñ 31-ne qadar Ukraina Qara deñiz İqtisadiyat İşbirligi Teşkilâtınıñ reisligini yapacaq.

XS
SM
MD
LG