Link açıqlığı

Bağçasaraydaki tintüvlerniñ şaatı 30 künge apiske alına bile – Qırım faali


Bağçasarayda qırımtatarlarnıñ evlerinde keçirilgen tintüvlerniñ şaatı Osman Belâlov 30 künge memuriy apiske alına bile ya da 150 biñden 300 biñ rublege qadar (66 biñden 132 biñ grivnağa qadar – QA) para cezasını ala bile. Bunı iyünniñ 28-de Qırım faali Server Mustafayev Qırım.Aqiqatqa bildirdi.

«Belâlov Osmannı kene «qanunsız mitingde» iştirak etkeni içün aynı madde boyunca mesüliyetke çekeler. Birinci kere onı 2016 senesi mayısnıñ 12-de Bağçasaraydaki vaqialar içün mesüliyetke çekken ediler. O vaqıt oña 10 biñ para cezası berildi. Bugün onı aynı madde boyunca celp etip, Seydamet Mustafayev tutulğanda «qanunsız mitingde» iştirak etmesinde qabaatlaylar», – dedi Mustafayev.

Faalniñ aytqanına köre, bu davanıñ birinci oturışı salı künü, iyünniñ 27-de keçirilecek edi, lâkin «mahkemeniñ işi çoq olğanı içün» iyünniñ 30-na avuştırğanlar.

Martnıñ 7-de Kreml kontrol etken Qırım mahkemesi qanunsız kütleviy aktsiyada iştirak etmesinde qabaatlanğan Osman Belâlovnıñ şikâyet arizası red etilgen edi.

Yanvar ayınıñ soñunda Bağçasaraydaki Rusiye mahkemesi Osman Belâlovğa 10 biñ ruble para cezasını belgilegen edi.

Mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG