Separatizmge çağıruv yapqanından qabaatlanğan qırımtatar halqı liderleriniñ birisi İlmi Ümerovnıñ davasında yañı prokuror Yelena Artemenko peyda oldı, dep bildire Qırım.Aqiqat mühbiri.
Onıñ aytqanına köre, keçken mahkeme oturışlarında iştirak etken devlet qabaatlayıcısı Oleg Sardinov yañı vazifege başladı vve esnasta iştirak etip olamay.
İmaye yañı prokurornıñ çetleştirilmesini istep, devlet qabaatlayıcısı ne sebepten deñişkenini añlatmağa ve keçken oturışlarnıñ protokollarını ögrenmesini talap etti.
«Aksi alda mahkemeni yañıdan başlamağa ya da dava uydurılğanını tanımağa kerek», – dep ayttı İlmi Ümerov.
Qadı Andrey Kuleşov prokurornı çetleştirmege razı olmadı. Oturış ise iyülniñ 5-ne avuştırıldı.
Çarşenbe künü, iyünniñ 28-de, qırımtatar milliy areketi liderleriniñ birisi İlmi Ümerovnıñ davası boyunca daa bir mahkeme oturışı olıp keçti.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı. Er afta çarşenbe künleri mahkeme oturışları olacağı haber etile.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
