Link açıqlığı

Saatnıñ esas haberi

Ahtem Çiygoznıñ apiste yatma müddetini oktâbrniñ 8-ne qadar uzatıldı – advokat


Ahtem Çiygoz, arhiv fotoresimi
Ahtem Çiygoz, arhiv fotoresimi

Kreml kontrol etken işğal etilgen Qırımnıñ Yuqarı mahkemesi iyünniñ 22-de olıp keçken oturışında prokurornıñ muracaatını qanaatlendirip, Ahtem Çiygoznıñ apis cezasını üç ayğa – oktâbrniñ 8-ne qadar uzattı. Bunı Çiygoznıñ advokatı Nikolay Polozov oturışnıñ birinci qısmı yekünlengen soñ bildirdi.

«Mahkeme bir buçuq saat mesleat odasında olıp, prokurornıñ muracaatını qanaatlendirdi ve imaye köstergen iç bir delilge emiyet bermedi», – dep tarif etti Polozov.

Teneffüsten soñ imaye şaatlarınıñ sorğusı planlaştırıla. Bundan ğayrı, advokatlar bir sıra muracaat berecek ola.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.



XS
SM
MD
LG