Link açıqlığı

Rusiye Federal havfsızlıq hızmetiniñ Qırım idaresi faal Suleyman Kadırovnıñ davası boyunca taqiqatnı avgustnıñ 7-ne qadar uzattı. Bunı advokatı Emil Kürbedinov iyünniñ 22-de Qırım.Aqiqatqa tarif etti.

«Bugün mayısnıñ 29-da çıqqan haber kâğıtını aldım, Kadırovnıñ şeklenmesine dair cinaiy iş taqiqatı 10 ayğa – 2017 senesi avgustnıñ 7-ne qadar uzatıldı. Bu davanıñ taqiqatçısı da deñişti», – dedi Kürbedinov.

Advokatnıñ bildirgenine köre, faal mahkeme-psihiatrik ekspertizadan keçti.

«Suleyman Kadırov bir saat ekimnen laf etip onı keçti. Sağlam olğanına dair netice çıqarılması içün bir saat ketti. Böylece, taqiqat qabaatlanğan ya da şeklengen kişi hasta olğanını köstermesin dep tedbir ala», – dep qayd etti advokat.

2016 senesi oktâbrniñ 5-de Rusiye uquq qoruyıcıları qırımtatar faili Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv qadı Rodionovnıñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenme Qararı esasında keçirildi.

2016 senesi oktâbrniñ 11-de Suleyman Kadırovğa qarşı separatizm içün cinaiy iş açıldı.

Aprelniñ 3-nde qırımlı fail ve uquq qorçalayıcı Suleyman Kadırov, o, ekstremistler cedveline kirsetilgeni aqqında beyan etti. Bunen beraber, yekâne qazançı kelgen bank kartası blok etilgen eken.

İşğalden soñ Qırımda mustaqil mühbirler, qırımtatar faalleri ve Meclis azalarınıñ evlerinde tintüvler sıq-sıq keçirilip başladı.

Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.


XS
SM
MD
LG