Link açıqlığı

Qırımdaki mahkeme yaltalı «Hizb ut-Tahrir davasınıñ» mabüsi Bekirovnı nezaret altında qaldırdı


Kreml kontrol etken işğal etilgen Qırımnıñ Yuqarı mahkemesi iyünniñ 22-de yaltalı «Hizb ut-Tahrir davasınıñ» mabüsi Enver Bekirovnıñ şikâyet arizasını red etip, onı nezaret altında qaldırdı. Bunı Qırım uquq qorçalayıcı gruppası haber ete.

Berilgen malümatqa köre, oturış qapalı şekilde keçirilip, Bekirovğa qoltutmağa kelgen faaller içeri alınmadı. Faal Osman Arifmemetovnıñ QUQGğa bergen malümatına köre, mahkemege ancaq mabüsniñ ömür arqadaşı kirsetildi.

Bundan evel Qırım Yuqarı mahkemesi yaltalı «Hizb ut-Tahrir davasınıñ» mabüsi Vadir Siruk ve advokatınıñ şikâyet arizasını qanaatlendirmeyip, onı apiste qaldırğan edi.

İyünniñ 5-de Kreml kontrol etken Qırım Yuqarı mahkemesi yaltalı «Hizb ut-Tahrir davası» mabüsleriniñ apis cezasını eki ayğa uzatqan edi.
Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Siruk tutulğan edi.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG