Link açıqlığı

Qırımda «Çiygoz davası» mahkemesinde Milletlerara munasebetler işğalci komitetiniñ reisi Zaur Smirnov sorğuğa çekildi


Kreml kontrol etken Qırım Yuqarı mahkemesinde iyünniñ 27-de Ahtem Çiygoz davasınıñ şaatı olaraq Kreml kontrol etken Qırımnıñ milletlerara munasebetler ve sürgün olunğan vatandaşlarnıñ işleri komitetiniñ reisi Zaur Smirnov sorğuğa çekildi.

Qırım.Aqiqat mühbiriniñ bildirgenine köre, Zaur Smirnovnıñ sorğusı yekünlenmedi, ve iyünniñ 28-de mahkeme oturışında devam etecek.

Mahkemede Smirnov 2014 senesi fevralniñ 25-de olğan Meclis toplaşuvı aqqında ikâye etti. Onıñ aytqanına köre, qırımtatar liderleriniñ birisi Refat Çubarov ertesi künü «Yuqarı Şura sessiyasınıñ keçirilmesine keder etmek içün» miting ötkerilmesi aqqında ilân etken edi.

«Kvorumnı hatırlamayım. Kün tertibi bar edimi-yoqmı hatırlamayım. Çubarovnen olğan subetimni hatırlayım, qırımtatarlarnıñ Yuqarı Şura yanında keçirgen bütün mitingleri qalabalıqlarnen yekünlengenini aytıp, şimdi bu kerekmey dedim. Amma qarar alındı ve onı kimse lâğu etmeycek, dep cevap berdi. Sessiya qırımtatarlar ve Qırım ealisi içün telükeli ola bile, dep aytqan edi», – dedi Zaur Smirnov.

Onıñ bildirgenine köre, Meclis azaları aynı meydanda «Russkoye yedinstvo» keçirecek mitingi aqqında fevralniñ 25-de haber aldılar. «Çubarov sabadan bütün meydannı almağa istedi, ne «Russkoye yedinstvo» mitingine, ne de sessiya keçirilmesine imkân bermemek içün. İştirakçilerni bütün Qırımdan toplamağa qarar aldı, tesisçiyalerinden biri olğan ATR telekanalını celp etti. Sessiya keçirilmesine imkân bermemek kerek, dep ayta ediler. Men kanalnı baqmadım, amma insanlar miting aqqında andan eşitkenini ayta ediler», – dep qayd etti Smirnov.

Zaur Smirnovnıñ aytqanına köre, o, miting iştirakçileriniñ yanında ne armatura, ne de başqa bir silâ körgen. Miting başlağan soñ Smirnov, aytqanına köre, Çubarovnen beraber Şura binasına kirip, tışarıda olğanlarnı salondaki monitorlardan seyir etken edi.

SİZO ile bağ üzülgeni içün şaatnıñ sorğusı yekünlendi. Ahtem Çiygoz andan esnasta iştirak ete. Zaur Smirnovnıñ sorğusı iyünniiñ 28-de saba saat 9:30-da devam etecek.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qoltutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qoltutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG