Kreml kontrol etken Qırım Yuqarı mahkemesine qırımtatar milliy areketi liderleriniñ birisi Ahtem Çiygoz davasınıñ oturışına Kreml kontrol etken Qırımnıñ milletlerara munasebetler ve sürgün olunğan vatandaşlarnıñ işleri komitetiniñ reisi Zaur Smirnov keldi. Bundan evel eki kere oturışnı qarçığan edi. Bunı Qırım.Aqiqat mühbiri iyünniñ 27-de haber ete.
Smirnov şaatlıq ete, onıñ sorğusı başlandı.
Oturış vaqtında advokat Nikolay Polozov mahkemege Moskva kontrol etken Qırım parlamentiniñ spikeri Vladimir Konstantinovnıñ sorğuğa çağırılmasını istegen.
«Fevralniñ 26-da deputatlarnıñ qayd oluvınen bağlı vaziyetni añlata bilecek yekâne kişidir. Üç deputatnı sorğuğa çektik, iç birisi miting sebebinden sessiyağa kirip olamağanını aytmadı. Konstantinov bunı tarif ete bile», – dep añlattı muracaatını Polozov.
Mabüs Ahtem Çiygoz muracaatqa qoltuttı.
«Qoltutam, doğru olğanını tüşünem, çünki deputatlar Kövitidi ve Tsekov bir-birine zıt kelgen malümat bereler. Konstantinovnı sorğuğa çekip, bütün bularnı al etmek mümkün», – dep qayd etti o.
Prokuror Konstantinovnıñ sorğuğa çekilmesine qarşı çıqtı, lâkin mahkeme Konstantinov esnasta iştirak etmeli, dep qarar çıqardı. Onıñ sorğusı iyülniñ 10-na belgilengen.
İyünniñ 19-da «Çiygoz davasınıñ mahkemesinde» Kreml kontrol etken Qırımnıñ milletlerara munasebetler ve sürgün olunğan vatandaşlarnıñ işleri komitetiniñ reisi Zaur Smirnov şaat olaraq sorğuğa çekilecek edi. Faqat Smirnov mahkemege kelmeyip, iş yollanmasına ketti. İyünniñ 21-de olğan oturışqa da kelmegen edi.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qoltutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qoltutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
