Link açıqlığı

Avropa Şurası Parlament Assambleyasında (PACE) Qırım aqşamı açıldı. Bunı iyünniñ 28-nde öz Twitter saifeside Ukrainanıñ Avropa Şurasındaki resmiy temsilcisi Dmıtro Kuleba yazdı.

«Musafirler arasında – PACE deputatları ve diplomatlar. Samimiy ve küçlü bir sanat leyhası Qırım – Ukraina olğanı daa bir kere köstere», – dep yazdı Kuleba.

Bundan evel PACE teşkilâtında Ukraina Yuqarı Radası daimiy eyyetiniñ yolbaşçı muavini Georgiy Logvinskiy, Avropa Şurası Parlament Assambleyası binasında «Qırım Künü» keçirilecegini beyan etken edi. Bu merasimde diplomatlar, elçiler ve Avropa İsnan aqları Mahkemesiniñ vekilleri iştirak ete bilecek. Logvinskiniñ sözlerine köre, ukrain eyyeti Ukrainanıñ ve istilâ etilgen Qırımnıñ meselesi PACE kün mevzuları sırasına olması içün er şey yapa.

2017 senesi aprel ayında çeşit memleketlerni ve siyasiy ittifaqlarnı temsil etken 45 PACE azası umumiy beyanname imzalap, Rusiyeden, BM Halqara mahkemesiniñ emirini yerine ketirip, Qırımtatar Milliy Meclisniñ faaliyetine izin bermege ve Qırımda ukrain tiliniñ taqip etilmesini toqtatmağa talap etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG