Qırımtatar milliy areketiniñ yetekçilerinden biri İlmi Umerov, FSB ve Rus prokuraturası yarımadada nuqsanlı çalışqanını ve çalışmağa alışmağanını tüşüne. Bunı Umerov iyünniñ 28-nde öz davasınıñ mahkeme toplaşuvından soñ video-muraacaat vastasınen beyan etti.
«Amma olar da (FSB ve Qırımnıñ Rus prokuraturası – QA) er vaqıt er şeyni becerip olamay. Biz şaatlarnıñ «cayılıp» ketkenlerini köre edik, olar dava malümatlarınıñ bazı protokollarından vazgeçe edi. Şimdi nuqsanlı ve yañlış surette prokurornıñ deñiştirilmesine yanaşqanlarını köremiz. Mahkeme bir de bir başqa qarar alsa edi, bu davanıñ uydurılması devam etkenini eminliknen beyan ete bilir edik. Amma mahkemeci, zanımca, öz vazifesine köre doğru olğan yekâne qararnı qabul etti – başqa künge qaldırıp (toplaşuvnı – QA), yañı prokurorğa davanıñ malümatını ögrenmege imkân berdi», – dedi Umerov.
Bundan evel, separatizm çağıruvlarında qabaatlanğan İlmi Umerovnıñ davası çerçivesinde yañı prokuror Yelena Artemenko peyda olğanı belli olğan edi. Onıñ sözlerine köre, evelki mahkeme oturışlarında iştirak etken devlet qabaatlayıcısı Oleg Sardinov artıq yañı vazifede buluna ve ceryanda iştirak etip olamay.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
