Bağçasarayda musulmanlar iyünniñ 27-nde Han-Çair camisinde Oraza Bayramına bağışlanğan mahsus merasimge ve namazğa keldi.
Qırım.Aqiqat muhbiri bildire ki, kelgenler içün kebap ve pilâv azırlanıldı, balalar içün ise oyunlar ve çeşit şeñlikler teşkil etildi.
Bayram merasiminiñ teşebbüsçileri, Qırım musulmanları içün Oraza Bayramı, İslâmnıñ eki büyük bayramlarından birisi olaraq, pek müim olğanını qayd etti, hususan «yat ananeler menimsenilgen vaqıtta» bu bayramnıñ canlanuvı daa emiyetlidir.
Bu bayram munasebetinen bir-qaç kün devamında Qırımnıñ çeşit rayonlarında bayram merasimleri keçirile.
Oraza Bayramı – Ramazan ayı yekünlengen soñ qayd etilgen bayramdır, musulman taqvimindeki eki büyük bayramdan birisi ola. Bu sene o iyünniñ 25-nde başlandı.
