Yaltalı «Hizb ut-Tahrir davasını» baqqan Rusiye taqiqatçıları taqiqatnı iyülniñ 8-ne qadar yekünlemege niyetleneler. Bunı tutulğanlarnıñ advokatı Aleksandr Popkov iyünniñ 27-de Qırım.Aqiqatqa bildirdi.
«İnsan taqiqat altında olıp, bir buçuq yıldan ziyade nezaret altında qalamay, taqiqatçılar insanlarnı ya azat etmege, ya da taqiqatnı yekünlep, malümatnı mahkemege bermege mecbur. Taqiqatçı taqiqatnı yekünlep, kelecek afta iyülniñ 8-de soñki qabaatnı bildirecek, dep haber etti», – dedi Popkov.
Onıñ aytqanına köre, dava Rostov-na-Donu şeerindeki arbiy mahkemede baqıla bile.
«Rusiye qanunlarına köre, terrorizmnen bağlı bütün davalar, şu cümleden müşterilerimiz qabaatlanğan terrorist teşkilâtlarda iştirak etmesi, bir qaç arbiy mahkemede baqıla bile, olarnıñ arasında Moskva bölge mahkemesi ve Rostov mahkemesi bar. Aqyarlı «Hizb ut-Tahrir davasınıñ» dörtlüsi öyle olğan edi. Öleg Sentsovnıñ işi de anda baqıldı, çünki terrorist ifadesi bar», – dep tarif etti advokat.
Yaltalı «Hizb ut-Tahrir davasınıñ» mabüsleri Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste yatalar. Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Siruk tutulğan edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
