Link açıqlığı

Ekspertiza faal Suleyman Kadırovnıñ yazğanlarında Rusiye topraq bütünligi bozmaq çağıruvlarını tapmadı – advokat


Qırım faali Suleyman Kadırov psihiatrik ekspertiza neticeleri ve psihologik-lingvistik ekspertiza müellifleriniñ sorğu neticelerinen tanış oldı. İçtimaiy ağlarda yazğanlarında qomşu Rusiyeniñ topraq bütünligini bozmaq çağıruvları tapılmadı. Bunı advokat Emil Kürbedinov Qırım.Aqiqatqa haber etti.

Buña baqmadan, topraq bütünligini bozmaq çağıruvlarında qabaatı lâğu etilmedi.

«Filmde çağıruvlar bar, izaatlarda olmasa da, razılıq bar. Qanun bunıñ cezasını belgilemey. Buña baqmadan, mahkemeden aldın teşkerüv yekünlenmey», – dep qayd etti Kürbedinov.

Rusiye Federal havfsızlıq hızmetiniñ Qırım idaresi faal Suleyman Kadırovnıñ davası boyunca taqiqatnı avgustnıñ 7-ne qadar devam ettirdi.

2016 senesi oktâbrniñ 5-de Rusiye uquq qoruyıcıları qırımtatar faili Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv qadı Rodionovnıñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenme Qararı esasında keçirildi.

2016 senesi oktâbrniñ 11-de Suleyman Kadırovğa qarşı separatizm içün cinaiy iş açıldı.

Aprelniñ 3-nde qırımlı fail ve uquq qorçalayıcı Suleyman Kadırov, o, ekstremistler cedveline kirsetilgeni aqqında beyan etti. Bunen beraber, yekâne qazançı kelgen bank kartası blok etilgen eken.

İşğalden soñ Qırımda mustaqil mühbirler, qırımtatar faalleri ve Meclis azalarınıñ evlerinde tintüvler sıq-sıq keçirilip başladı.

Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.

XS
SM
MD
LG