Kreml kontrol etken Qırım Yuqarı mahkemesi iyünniñ 22-de yaltalı «Hizb ut-Tahrir davasınıñ» mabüsi Arsen Cepparovnıñ imayesi bergen şikâyet arizasını red etti. Böylece, o, avgustnıñ 8-ne qadap nezaret altında qalacaq. Bunı advokatı Cemil Temişev iyünniñ 23-de Qırım.Aqiqatqa bildirdi.
Onıñ aytqanına köre, Arsenniñ alı bir qarar oldı, lâkin advokat Cepparovnıñ hastahanede baqılmasını talap etmege planlaştıra.
«Şimdi bir qarar oldı, ilâc qullandı, böyle alınıñ sebebini bilmeymiz, bu sebepten baqılması kerek», – dedi Temişev.
Advokat Facebook saifesinde oturış qapalı şekilde keçirilgenini haber etti, faqat mahkeme qararı seslendirilgende Cepparovnıñ soy-soplarına kirmege izin berildi.
İyünniñ 13-de Cepparovnı 25 künge kartserge qapattılar. O, SİZO memuriyetiniñ talabına qapunı açmağan eken.
İyünniñ 16-da advokat Cemil Temişev Cepparov sağlığı fenalaşqanından oña tibbiy yardım kösterilmesi içün ariza yazdı, dep bildirdi.
Yaltalı «Hizb ut-Tahrir davasınıñ» mabüsleri Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste yatalar. Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Siruk tutulğan edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
