Link açıqlığı

Dünyanıñ Ukraina elçihaneleri qırımtatar bayrağını astılar


Qırımtatar bayraq kününde, iyünniñ 26-da, dünyanıñ Ukraina elçihaneleri Ukraina bayrağı yanına qırımtatarlarnıñ milliy bayrağını asa. Haber siyaseti naziriniñ vazifelerini eda etken Emine Ceppar Kyivde matbuat konferentsiyasında çıqışta bulunıp, bu teşebbüs Tışqı işler nazirliginen beraber yerine ketirilgenini ayttı.

Ukraina elçihaneleri resmiy Twitter saifelerinde qırımtatar bayrağı olğan fotoresimlerni derc ete.

Mezkür teşebbüske Ukrainanıñ Büyük Britaniya, Yaponiya, Bulğaristan, Gürcistan, Sloveniya ve Mısır elçihaneleri qoltuttı.

Kyivde iyünniñ 26-da Qırımtatar bayraq künü munasebetinen bir sıra tedbir keçirilmesi planlaştırıla. Mustaqillik meydanında avtoyürüş ve miting keçirilecek.

Bazarertesi künü, iyünniñ 26-da, qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-de Aqmescitte keçirilgen ekinci Qırımtatar Milliy Qurultayınıñ birinci künü belgilengen edi.

Qırımtatar bayrağı altın tamğalı kök bayraqtır.

XS
SM
MD
LG