Ukraina Tışqı işler nazirligi Rusiye prezidenti Vladimir Putinniñ Qırım ziyaretine Kyiv ile muzakereler keçirilmegeni içün narazılıq bildirdi. Bu aqta nazirlikniñ saytında aytıla.
«Ukraina Tışqı işler nazirligi Rusiye Federatsiyasınıñ prezidenti Vladimir Putin yolbaşçılığında Rusiye eyyetiniñ 2017 senesi iyünniñ 24-de kerçekleştirgen Rusiye Federatsiyası tarafından Ukrainanıñ vaqtınca işğal etilgen toprağı – Qırım Muhtar Cumhuriyeti ziyaretine sert bir şekilde narazılıq bildire», – dep aytıla nazirlikniñ haberinde.
Ukraina tarafı Rusiye memurlarınıñ mezkür Qırım ziyaretini Ukrainanıñ devlet sıñırları ve topraq bütünliginiñ bozulması, Rusiye tarafından halqara uquq qaidelerine zıt kelmesi olaraq tanıy.
Ukraina Tışqı işler nazirligi Rusiyege narazılıq beyanatını yolladı.
İyünniñ 24-de Rusiye prezidenti Vladimir Putin Qırımğa kelip çıqtı. O, Gurzuftaki «Artek» bala lagerini ziyaret etip, amerikalı Samanta Smitke bağışlanğan nevbetni açtı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
