Qırımtatar bayraq künü, iyünniñ 26-da, Aqmescitte avtoyürüş ve futbol yarışı keçirilecektir. Bunı Kreml kontrol etken şeer memuriyetiniñ matbuat hızmeti bildire.
Berilgen malümatqa köre, avtoyürüş saat 9.30-da başlaycaq, qırımtatar bayraqlı maşinalar Aqmescit soqaqlarını dolanıp çıqacaq. Soñra avtoyürüş iştirakçileri Aqmescit rayonınıñ Qulçuq (Rodnikovoye) köyüne yol alacaq, Temelli qasabasınıñ stadionında saat 10-da Aqmescit şeeri ve Aqmescit rayonınıñ futbol taqımları arasında matç olacaqtır. Qırımtatar bayraqlarını kökke uçtırmağa planlaştırıla.
Memuriyetniñ qayd etkenine köre, Qırımtatar bayraq künü cemaat teşkilâtlarınıñ teşebbüsi ile ötkerile.
Ukrainada Qırımtatar bayraq künü munasebetinen fleşmob teşkil etildi: Facebook içtimaiy ağınıñ qullanıcıları fotoresimlerine Ukraina ve qırımtatar bayraqlarınıñ resimlerini qoya.
Qırımtatarlarnıñ bayrağı altın tamğalı mavı bayraqtır. İlk sefer bayraq 1917 senesi Qırımtatar Milliy Qurultayında qabul etilgen edi. 2010 senesinden başlap iyünniñ 26-sı qırımtatar bayraq künü olaraq qayd etile.
İşğal altındaki Qırımğa yaqın olğan Geniçesk rayonında Qırımtatar bayraq künü munasebetinen çeşit yürüş ve avtoyürüşniñ keçirilmesi planlaştırıla. Arabat belindeki Sçastlivtsevo köyünde «Eki bayraq – bir devlet» aktsiyası ötkerilecek, Novoalekseyevka qasabasında ise avtoyürüş ve yürüş keçirilmesi planlaştırıla.
