Link açıqlığı

Moskva Poloniyanıñ Kommunizm abidelerini yoq etecegine çorlandı


Poloniya Seymi, Sovetler deviriniñ abidelerini yoq etmege qarar aldı, Rusiyede ise buña qarşı itiraz bildirildi.

«Hususiy ürmetsizliknen leh akimiyeti bu qararnı bizler içün aziz ve facialı künde qabul etti, bu künü Gitler SSCB-ge qarşı ücüm etken edi. Böyle areket ancaq – ölülerniñ hatırası üzerinde rezaletli aqaret olaraq tanılmaq mümkün. Abidelerge qarşı «cenkni» devam etkenler añlamaq kerekler ki, rus-leh munasebetleriniñ ket-kete beterleşecegine sebepçi olalar», – böyle sözler iyünniñ 22-nde aqşam yayınlanğan Rusiye Tışqı işler nazirliginiñ beyanatında yer alğan.

Cumaaqşamı künü Lehistan Seymi, bina ve obyektlerniñ adlarında kommunizmniñ ya da başqa totalitar rejimlerniñ teşviqatını yasaqlağan qanunğa deñişmeler kirsetti. Vesiqağa binaen, Sovetler deviriniñ eykelleri, şu sırada Qızıl Ordu abiledeleri yoq etilmeli. Poloniya millet vekilleri bu abidelerni, deñişmeler qabul etilgeninden soñ, 12 ay devamında alıp taşlamağa teklif ete.

Mezarlıqlarda ya da başqa qabirlerde yerleştirilgen eykeller, em de mimariy yadikârlıqlar cedveline kirsetilgen abideler bu sıradan harictir.

Lehistanda Sovetler devirinden qalğan 469 abide qalğan, olardan 250-si Qızıl Orduğa bağışlanılğan.

XS
SM
MD
LG