Bu aftanıñ soñuna qadar Aqmescitte ambrosia otunı yoq etmek içün iş başlatılacaq. Bu ve bazı başqa tedbirlerniñ alınılması içün «Gorzelenhoz» şirketine şeer bücetinden 5 million ruble (2 million grivnâdan ziyade – QA) köleminde subsidiya ayırıldı. Bunı Kremlniñ nezaretindeki Aqmescit şeer memuriyetiniñ yolbaşçı muavini Kirill Skorohodov istismar-iqtisadiy toplaşuv devamında bildirdi.
«Büyük diqqat şeerniñ merkez soqaqlarına ve bala meydançıqlarına berilecek», – dep aytıla bildirüvde.
Aprel ayında, işğal etilgen Qırımda «ambrósia artemisiifólia» otu sebebinden karantin fitosanitar rejimi qabul etilgen edi.
Ambrosia – çiçek tozunen saman allergiyasına sebepçi olğan eñ telükeli kiyik otlardan biridir. Ambrósia artemisiifólia – eñ telükeli ve zararlı ot çeşitlerinden biri olıp, Qırımda çoq yerde öse, em de Ukrainanıñ başqa yerlerinde ve qomşu Rusiyeniñ Krasnodar vilâyetinde çoq ösmekte.
