Bu sene Herson vilâyetiniñ aliy oquv yurtları işğal etilgen Qırım ve Donbassnıñ işğal altındaki topraqlarından biñ studentni bücet parasına qabul etmege azır. Bu raqamnı Herson vilâyeti valisiniñ muavini Andrey Balon «Skifiya» telekanalınıñ efirinde seslendirdi, dep bildire Herson vilâyeti devlet memuriyetiniñ saytı.
Ukrainada açılğan 12 «Qırım – Ukraina» merkezinden üçü Hersonda yerleşe. Olar Herson devlet universiteti, Herson milliy tehnik universiteti, Herson devlet deñiz akademiyasında çalışa. Andrey Balonniñ aytqanına köre, bu cedvelge Herson devlet agrar ünivesitetiniñ kirsetilmesi muzakere etile.
Bazarertesi künü, iyünniñ 19-da, Ukrainada «Qırım – Ukraina» tasil merkezleri çalışıp başladı. Olar Qırım abituriyentlerine 12 ukrain aliy oquv yurtuna tışqı mustaqil imtianlarnı bermeyip kirmege imkân bere.
