İyünniñ 19, bazaertesi künü, Ukrainada qırımlı abituriyentlerniñ VNO’sız (Bilgige tışqı mustaqil qıymet kesüv) 12 dane ukrain aliy oquv yurtına qısqartılğan sistema boyunca kirmeleri içün tasil merkezleri çalışıp başlay.
Olarnıñ cedveli Ukraina tasil ve ilim Nazirliginiñ saytında derc etilgendir.
Merkezler sentâbrniñ 30-na qadar çalışacaq.
Yaqın künlerde vaqtınca işğal etilgen topraqlar ve memleket içinde köçip kelgenlerniñ meseleler boyunca nazir Vadim Çernış işğal altındaki Qırım ve vaqtınca işğal etilgen Donbasstaki abituriyentlerge muracaat eterek, olarnı ukrain aliy oquv yurtlarına kirmege çağırdı. Aynı zamanda qırımlı abituriyentlerge Ukraina tasil ve ilim naziri Liliya Grineviç de muracaat etti.
Qırımlılar «Qırım - Ukraina» merkezleriniñ faaliyeti ve ukrain aliy oquv yurtlarına oqumağa kirilmesinen bağlı tafsilâtlı malümat almaq içün Qırım.Aqiqat materiallarını taqip etmeli.
Ukraina prezidenti Pötr Popoşenko iyünniñ 3-nde Qırım ve Donbassnıñ işğal etilgen qısmında yaşağan abituriyentler içün ayırılğan kvotalarnen bağlı №6116 qanunnı imzaladı. Qanunğa istinaden, orta tasil aqqında vesiqa alğan qırımlı abituriyentler, Zaporojye, Nikolayev, Odessa, ve Herson vilâyetlerinde yerleşken aliy oquv yurtlarına kirmek içün belgilengen kvotalar çerçivesindeki konkurs esasında keçirilgen kiriş imtianlarına köre qabul etilecek.
Vesiqağa binaen, kvotalar miqdarı 1000 talebelik bücet yerini teşkil etmekte. Qanun aqqındaki tafsilâtlıca malümatnı Qırım.Aqiqat materiallarında tapıp oqumaq mumkün.
