Ukrain uquq qorçalayıcıları iyünniñ 19-nda Viyanada OSCE konferentsiyasınıñ iştirakçilerine Rusiye tarafından istilâ etilgen Qırımda insan aqlarınıñ bozıluvı ve söz serbestliginiñ sıñırlanuvı aqqında tarif ete.
Bunen beraber, yarımadada jurnalistlerniñ faaliyetine kösterilgen qarşılıq, ukrain ve qırımtatar kütleviy haber vastalarınıñ (SMİ) işine qarşı yapılan basqı, faillerniñ ezilmesi aqqında malümat halqara teşkilâtlatlarnıñ temsilcilerine taqdim etildi.
Qırım.Aqiqat muhbiri bildire ki, Qırımdaki vaziyet aqqında derc etilgen maqaleler konferentsiyanıñ işi ötkerilgen salonnıñ kirişi yanında yerleştirilgen. Avropalı, ABD ve Rusiyeli iştirakçiler, yarımadada söz serbestliginiñ vaziyeti aqqında bilgi bergen risalelerni alıp meraqlana.
İyünniñ 20-nde konferentsiya çerçivesinde «İnsan aqları aqqında malümat merkeziniñ» vekilleri, istilâ etilgen Qırımda jurnalistlerniñ taqip etilmesinen alâqadar olğan qırımlı ve rusiyeli memurlarnıñ adlarını faş etecek.
OSCEtarafından teşkil etilgen «İstiqrarsızlıq vaqıtında SMİ serbestligi» konferentsiyası Viyanada iyünniñ 19-20 künlerinde ötkerile. Muzakere etilgen mevzular sırasında teşkilâtçılarnıñ diqqatı Rusiyeniñ, Ukraina ile alıp barğan davası devamında, yapqan propagandasına, SMİ serbestligine ve jurnalistlerniñ telükesizligine celp etilgen.
