İyünniñ 18-zi ve 19-nda Qırımda sağanaq, boranlı yağmur ve burçaq yağması beklenile. Bu aqta Qırımdaki rusiyeli Fecqulâde vaziyetler nazirligi idaresiniñ matbuat hızmeti bildirmekte.
«Çevre muitniñ monitoringi ve gidrometeorologiya boyunca Qırımdaki idaresi» devlet federal bücet teşkilâtınıñ malümatına köre, iyünniñ 18-zi kündüz künü ve iyünnin 19 devamında Qırımda yerine köre şiddetli sağanaq, boranlı yağmur ve burçaq yağmasınen, saniyede 20-25 metr tezliginde rüzgâr esmesi beklenile», – dep qayd ete matbuat hızmeti.
İdare er kesniñ muqayıt olmasını tenbiyeley. Hususan, evlerniñ pencereleri yahşı qapatılması, balkon ve lodjiyalardan sabitlenmegen eşyalarnıñ alıp taşlanması tevsiye etile. Tışarıda bulunğan arada billboardlardan, levhalardan, yol işaret levhaları ve elektik ağlarından uzaq turulması tevsiye etilmekte.
