Rusiye ükümeti işğal altındaki Qırımda Kreml nezaretindeki eki redaksiyağa maddiy yardım olaraq 210 million ruble (93 ml. grivna) ayıracaq.
Rusiyeli KHV (SMİ) bildirgenine köre, iyünniñ 16-nda «2017 senesi ve 2018-2019 senelerdeki muddetnen bağlı Federal bücet» aqqındaki mütenasip qanun leyhası, Rusiye Devlet duması tarafından ekinci oquvda qabul etildi.
«Bütünrusiye devlet televizion ve radioeşittirüv kompaniyası (VGTRK) çerçivesinde Qırım ve Aqyar territoriyasında çalışması içün teşkil etilgen eki yayınlav teşkilâtına, kirsetilgen tüzetüvlerde 210 million rublelik yardım ayırılması közde tutulmaqta», – denilmekte rusiyeli TASS agentliginiñ haberinde.
Ayrıca, Qırım aqqındaki eki dane vesiqalı filmniñ yekünlenmesi içün, daa bir tüzetmege binaen, ilâve 5 mln. ruble (2,2 mln. grivna civarında) ayırılması aqqında da söz yürsetrilmekte.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
