Rusiye Devlet dumasınıñ deputatı Ruslan Balbekniñ fikirince, «Aqyarnıñ içki siyaseti qabul etilmeycek bir vaziyette buluna». Onıñ aytqanına köre, şeer ükümetiniñ memurları ananeviy dinlerniñ liderlerini «körmemezlikke ura». Bunı Balbek Facebookta yazdı.
«Şeer ükümetiniñ memurları ananeviy din liderlerini körmemezlikke urıp, reabilitatsiyası yapılğanlarnıñ aq-uquqlarını ğayrıdan tiklev komissiyasını bir kere bile toplamadı, dinlerara şura iç yoq, milletlerara şura – kâğıtta quru yazılar. Tüşüniñiz – din ve millet cemiyetleri liderleriniñ iç birisi Rusiye Kününe bağışlanğan tantanalı merasimlerge davet etilmedi!», – dep yazdı o.
Deputat vaziyetni bilmege vade etti: «Qırım Cumhuriyeti ve Aqyar şeerinde devlet milliy siyasetiniñ yerine ketirilmesi alt komitetiniñ reisi olaraq çıqış komissiyanıñ erkânında Aqyarğa kelip, milletlerara bağlarnı ğayrıdan qurmağa tırışacam».
Ruslan Balbek 2016 senesi sentâbrniñ 18-de Rusiye Devlet duması saylavları neticesinde deputat oldı. Ukraina ve Ğarp memleketleri Qırımda keçirilgen saylavlarını tanımayıp, Balbek ve işğal etilgen yarımadada saylanğan diger deputatlarğa qarşı sanktsiyalar kirsetkenler.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
