İstilâ etilgen Qırımda şahsiy evlerniñ kirağa berilgemesini taqip etmek ğayesi baqılmaqta. Böyle obyektlerniñ qıdırılması ve qayd etilmesinen mahsus işçi gruppa oğraşacaqtır. Bunı Kremlniñ nezaretinde çalışqan Qırım Kurort ve turizm naziri Sergey Strelbitskiy beyan etti.
«Şimdi biz teşebbüs ettik, bizim mahsus işçi gruppamız teşkil olunacaq, oña Nazirler şurasınıñ reis muavini Larisa Opanasük reberlik yapacaq. İşbu gruppa şahsiy yerştirüv yerlerinen oğraşacaq. Yaz mevsimi – er şey açıq-aşkâr olğan bir vaqıttır, bügün mesken teklif etkenlen körünedir. Bergi hızmetinen ve başqa organlarnen birlikte, tatil mevsimine iç bir türlü keder etmeyip, pek ciddiy iş ötkerecemiz», – dedi o.
Onıñ sözlerine köre, yarımada idaresi endi eki yıldan berli, şahsiy evlerini ya da kiçik yerleşüv meskenlerini kiralıq bergen qırımlılar içün, patent sistemasınıñ qabul etilmesini talap ete. «Böyle tedbir bu biznesni kölgeden çıqarmağa ve bücetke para ketirmege imkân berecek», dep qoştı Strelbitskiy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
