Milliy Meclis reisiniñ muavini İlmi Umerovnıñ davasını Kremlniñ nezaretinde baqqan Aqmescit rayon mahkemesi nevbetteki oturışını ötkerdi. Toplaşuv devamında advokat Mark Feygin, mahkemeci Andrey Kuleşovdan, onıñ eki vatandaşlığı olğanına dair izaat istedi.
Bunı Facebookta mahkümniñ qızı Ayşe Umerova haber etti.
«Advokat Mark Feygin mahkemeci Kuleşov Andrey Sergeyeviçten oñın ekinci ukrain vatandaşlığı olğanına dair añlatuv istegenini beyan etti ve o, eki devletniñ vatandaşı olıp, nasıl etip mahkemeci vazifesini eda ete bilecegini soradı. Sual – onıñ kerçekten ukrain vadandaşlığı barmı. Mahkemeci bu hususta bir de bir añlatuv bermege razı olmadı ve bu cinaiy dava çerçivesinde o iç bir şey añlatmaq mecbur olmağanını dedi», – dep yazdı Ayşe Umerova.
Onıñ yayınlağan video-muracaatında advokat Mark Feygin: «Bizler mahkemeniñ statusı ve onıñ vekâleti aqqında soradıq. Zanımızca, mahkemeci Kuleşov Ukraina vatandaşı ola, buña dair isbatlarımız da bar. «Mahkemecilerniñ statusı aqqında» qanunnıñ 4-ci qısımı, 3-ci maddesine binaen, o aslında vekâletli mahkemeci olmaq mümkün degil ve onıñ İlmi Umerovğa nisbeten adaletli qarar almaq aqqı da yoq. Bu sebepten, biz bundan soñra, Ukrainadan vesiqalarnı qabul etkenimizde, mahkemeci bu davada öz vazifesini munasip şekilde eda etemeceginde kene israr etecemiz», – dep ayttı.
Mahkeme oturışında qabaatlayıcı tarafnıñ şaatları ifade berdi. Mahkeme kelecek afta iyünniñ 21-nde çarşenbe künü, saat 14.30 devam etecektir.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
