Link açıqlığı

Tuka: Rusiye Qırımnıñ demografik terkibini suniy yolnen deñiştirmekte


Georgiy Tuka, arhivden alınğan fotoresim

Rusiye işğal etilgen Qırımdaki arbiy küçüni ep arttırmaqta. Bu ise, esas Ukrainağa yapılabilecek tecavuz telükesinden ğayrı, yarımada ealisiniñ etnik terkibi deñişmesini de telükege kirsetebile.

Böyle bir fikirni, vaqtınca işğal etilgen topraqlar ve Ukraina içinde köçip kelgenlerniñ meseleleri naziriniñ muavini Georgiy Tuka iyünniñ 13-nde, er yıl Avropa Birligi ve Ukraina arasında insan aqları boyunca keçirilgen dialog çerçivesinde teşkil etilgen Avropalı ortaqlarnen yapılğan körüşüvde beyan etti.

«Qırım toprağında Rusiyeniñ arbiy küçüniñ arttırılması – büyük bir mesele. Rusiye çoq miqdarda kadrolı arbiylerni ketirmekte. Belli ki, arbiylernen beraber Qırımğa olarnıñ aileleri de köçip kelmekte. Olar bir-eki künge kelmeyler. Böyleliknen Rusiye Sovyetler Birliginiñ adımlarını tekrarlay – yani bütün bir regionnıñ demografik terkibini suniy yolnen deñiştire. Buña imkân berimemeli. Bu – halqara qanunlarnıñ bozuluvı demektir», – dep qayd etti Tula.

O ayrıca, Rusiye işğal altında bulunğan topraqklardaki vatandaşlarğa ukrain tili, edebiyatı, tarihıni ögrenmege, ukrain aliy oquv yurtlarına kirmek içün imtian bermege imkân tanığan ukrain saytlarını blok etkenini de qayd etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG