İyünniñ 14-nde Kyiv memuriy apellâtsion mahkemesi Ukraina Nazirler Şurasınıñ, Qırımnıñ memuriy sıñırından şahsiy eşyalarnıñ alıp keçilmesinen bağlı 1035 sayılı qararınıñ birincı maddesini qanunğa zıt ve küçsiz, dep tanıdı.
İnsan aqları boyunca Helsinki birliginiñ uquqçısı Maksim Timoçko Qırım.Aqiqatqa bildirgenine köre, artıq Qırım sakinleri zapt etilgen Qırımdan esas Ukrainağa er angi sıñırlama olmadan şahsiy eşyalarını alıp keçebileler, dep bildirdi.
«Qırım sakinleri şahsiy eşyalarından, hususan Gümrük kodeksiniñ 370 maddesinde sıralanğanlardan ğayrı epsiniñ çıqarılması yasaqlanğan edi. Bizler bu qarar, Qırım sakinleriniñ mükliyetnen bağlı aq-uquqlarını sıñırlağanına şikâyet ettik», – dep izaatladı Timoçko.
İnsan aqları boyunca Helsinki birliginiñ Ukrainalı uquqqoruyıcıları Ukraina Nazirler Şurasınıñ, işğal altındaki Qırımdan şahsiy eşyalarnıñ alıp çıqılmasını yasaqlağan 1035 sayılı qararınıñ birincı maddesi qanunğa zıt olğanını tanılmasına irişken edi.
Kyiv daire memuriy mahkemesiniñ Ukraina Nazirler Şurasınıñ 1035 sayılı qararınıñ qanunğa zıt olğanını tanığan dava qararı, martnıñ 20-nde «Mahkeme qararlarınıñ yekâne devlet cedveli»nde derc etilecek. İnsan aqları boyunca Helsinki birliginiñ Ukrainalı uquqçısı Anna Rossamahina cemaat qabulhanesinde aytqanına köre, işbu qarar Qırım sakinleriniñ er şeyini taşıması ihtimalını ortadan alıp taşlay.
